Kia Orana I te aroa ngao o to tatou Atu ko Iesu Mesia. Teia te reo o te tata Salamo ko te Atua to tatou akapuanga e te maroiroi, e tauturu vaitata roa ia kia rokoia e te tumatetenga. (Salamo 46:1)

Eaa tei tupu I te mataiti 1965 – 2025. Tena tei rauka I te tataia nga epetoma e 3 I topa ake nei.

Kia oki mai te pupu ura numero tai o te Kuki Airani ite mataiti 1973 no te akatueranga ite Sydney Opera House, kua noo teatea mamao te CINAT no te akatueraanga I te Mana Tauranga - Cook Islands Airport 1974.

Kua patiia te au apii tua rua, te au apii primary te mapu tane te mapu vaine te au metua no te Ariki vaine ngateitei o Peritane ko Queen Elizabeth II e tona tokorua e tona tere tangata te ka tae mai ki Rarotonga nei I te ra 29 no Tianuare 1974.

Ko te metua tane ko papa Ota Joseph te arataki o te au tarekareka turuturu ia e te pupu ura CINAT e te au apii o Rarotonga nei.

Eaa tei tupu I te ra maata, kua iriri ia te au paata no te apai I te Ariki Vaine e tana tane. Kua tae katoa mai a Princess Anne e tana tane e pera ki te au manuiri, Kua tae mai te pairere o te Ariki Vaine kua tuorooro ia atu ratou e Potikitau Putokotoko o Makea Ariki koia te metua tane e papa Anau Mamarangi.

Kua oti te au angaanga o te akatueraanga o te Mana Tauranga, kua aere atu te tere o te Ariki Vaine ki roto I tetai pia I te ngai toanga  pairere, no te akamarokura anga ia Papa Arapati Enere ki te taoanga ngateitei koia oki K.B.E ( KNIGHT OF THE BRITISH EMPIRE).

Ko te metua ma tamua teia o te iti tangata Kuki Airani ki runga I teia turanga ngateitei. Teia te reo o Paulo - E tau te tutaki o te tangata angaanga meitaki ki tana angaanga.

I taua tuatau rai tei konei teia tere o te Ariki Vaine kua akatuera ia te are taokotai anga o Titikaveka tei karangaia e ko te KENT HALL e pera katoa ki te are o te apii Tereora ko te PRINCESS HALL.

Eaa ia ngateitei tei rauka ia koe e Kuki Airani, te rave pakau a Sir Arapati Enere K.B.E. Teia ta Paulo I tata ki te ekalesia I Philipi - E rekareka I te Atu aua e tivata e karanga atu au kia kotou kia rekareka rai (Philipi 4:4)

I teia mataiti I topa ake nei kua akamaara tatou I te 50^th mataiti o to tatou Mana Tauranga. E maata ua atu te au tangata tei tae mai ma te anau Apii tua rua o Rarotonga nei I te turou I te Prime Minister e tona tere.

Na te pupu ura o te Fuinga o Niva, Manihiki e Rakahanga I tarekareka e I muri ake ko te taku rua.

Kia Orana e ka kite.

Pastor T Ngarima George.