Kia Orana e te ‘Ētita, no runga i teia tumu manako, e manako pu‘apinga teia.

Kare au e turu i tetai pati‘anga mei teia te tu. Ko teia tika‘anga ka tano ‘aia kia okena‘ia ki te tane/va‘ine a teta‘i tangata/va‘ine Kuki ‘Āirani no va‘o mai ‘ī to tatou ‘ipukarea. Te tumu kua toto‘īa ratou ki roto i te kōpu tangata tā rātou i tomo mai. Me kare e tamariki kia akano‘o‘ia tetai akano‘o‘anga tau no te reira tūtū tangata mē kore ra, tu piri‘anga tane vaine.

Kare au i mou i teia ta‘oanga Uritaua Mataiapo no te ‘ōronga atu i tetai puapinga no teta‘i tangata mei va‘o mai, mari ra, kia rauka ‘iaku i te paruru ‘ē te akako‘uko‘u ‘ī toku ‘iti tangata. Te ‘ākara nei au kare teia tika‘anga e pati‘ia mai nei e patu i te tango mei ta Pāpā Arapati i akano‘o no te Cook Island’s Party, e no te ‘Ipukarea, ka riro teia i te akavava‘i atu i to tatou tango a teia tuatau ki mua.

Te ‘ākaranga ra te kaveinga ‘ākateretere a Papa ‘Ārapati, “tuku i te tango, ‘ākamatūtū i te ‘iti tangata”.  ‘Āere mai a Papa Tom, “‘akamatūtū i te ‘iti tangata na roto ‘i te ‘ākameitaki ‘anga i te aranui no te ‘anga‘anga ‘ākapu‘apinga”, me kare kotou i mārama i teia nga manako, e pera akape‘ea tatou i te ta‘anga‘anga ‘anga i te reira, e ‘ākapoiri tikai teia i roto ia tatou.

Teia e tupu nei te ‘āriki nei tatou i te anoano o teta‘i ke, kare e no tatou teia anoano.

Ka turu au i te pati‘anga kia ‘ākaroa ‘iatu te tuatau ‘anga‘anga o teia au tangata/va‘ine ki runga i to tātou enua, kare rā au ‘ē turu kia ‘ōkena‘ia teta‘i tika‘anga tinamou kia no‘o ki roto i to tatou ‘Īpukarea.

‘Ūritaua Teariki-Taoiau Rongo MATAIAPO